‘মেঘ ঘোঁৰা’ৰ স্ৰষ্টা যুৱ কবি দ্বিজেন কুমাৰ দাসলৈ ২০২০ বৰ্ষৰ সাহিত্য অকাডেমি যুৱ বঁটা

0
248
'মেঘ ঘোঁৰা'ৰ স্ৰষ্টা যুৱ কবি দ্বিজেন কুমাৰ দাসলৈ ২০২০ বৰ্ষৰ সাহিত্য অকাডেমি যুৱ বঁটা

‘মেঘ ঘোঁৰা’ৰ স্ৰষ্টা যুৱ কবি দ্বিজেন কুমাৰ দাসলৈ ২০২০ বৰ্ষৰ সাহিত্য অকাডেমি যুৱ বঁটা : ‘মেঘ ঘোঁৰা’ৰ স্ৰষ্টা অসমৰ উদীয়মান যুৱ কবি তামুলপুৰৰ সু-সন্তান দ্বিজেন কুমাৰ দাসে ২০২০ বৰ্ষৰ সাহিত্য অকাডেমি যুৱ বঁটা লাভ কৰিবলৈ সক্ষম হৈছে। সাহিত্য অকাডেমি যুৱ পুৰস্কাৰ- ২০২০-এ আজি এই বঁটা ঘোষণা কৰাৰ পিছত তামুলপুৰ মহকুমাৰ সাহিত্যানুৰাগী সকলৰ মাজত আনন্দৰ বন্যা নামি আহে।

বাক্সা জিলাৰ তামুলপুৰৰ কালাকুছি গাঁৱত ১৯৮৫ চনৰ ১৫ মে’ত জন্ম গ্ৰহণ কৰা প্ৰয়াত হৰিণাৰায়ণ দাস আৰু প্ৰয়াত যামিনী দাসৰ পুত্ৰ দ্বিজেন কুমাৰ দাস অসমীয়া বিষয়ত স্নাতকোত্তৰ ডিগ্ৰীধাৰী। পেছাত শিক্ষক দাস বৰ্তমানে বেলবাৰী উচ্চ মাধ্যমিক বিদ্যালয়ত কৰ্মৰত।

সৰুৰে পৰা সাহিত্য চৰ্চা কৰা দ্বিজেন কুমাৰ দাসে লিখা কবিতা সমূহ অসমৰ আগশাৰীৰ প্ৰায় আলোচনীত প্ৰকাশ হৈ আহিছে। বহু কেইখন কবিতা পুথি, সাধু কথা, নাটক আদি লিখা আৰু প্ৰকাশ কৰাৰ লগতে বিভিন্ন অনুষ্ঠান-প্ৰতিষ্ঠানৰ বহু আলোচনীও দ্বিজেন কুমাৰ দাসে সম্পাদনা কৰিছে।

তামুলপুৰৰ বিভিন্ন মঞ্চত দক্ষ ঘোষক হিচাপে পৰিচিত দ্বিজেন কুমাৰ দাসৰ পূর্বায়ন প্ৰকাশনৰ দ্বিতীয় কাব্য সংকলন ”মেঘ ঘোঁৰা” কাব্য গ্ৰন্থখন ২০১৮ চনত প্ৰকাশ কৰি সাহিত্যানুৰাগীৰ মাজত যথেষ্ট সমাদৰ লাভ কৰিবলৈ সক্ষম হৈছিল আৰু প্ৰশংসিতও হৈছিল।

উল্লেখ্য যে, ২০০৭ চনত প্ৰকাশিত দ্বিজেন কুমাৰ দাসৰ প্ৰথমখন কাব্য পুথি ‘উশাহ থাকে মানে অ’ মনে তৰা’ পাঠক সমাজৰ পৰা যথেষ্ট সমাদৰ লাভ কৰিছিল।

নিৰৱচ্ছিন্ন ভাৱে সাহিত্য চৰ্চা অব্যাহত ৰখা দ্বিজেন কুমাৰ দাসক সাহিত্য অকাডেমি যুৱ বঁটা-২০২০ লাভ কৰাৰ বাবে অসম সাহিত্য সভাৰ বাৰ্তা সম্পাদক তথা মাহেকীয়া বাৰ্তাপখিলীৰ সম্পাদক ব্ৰজেন্দ্ৰ নাথ ডেকা, তামুলপুৰ প্ৰেছ ক্লাব, তামুলপুৰ শাখা সাহিত্য সভা, তামুলপুৰ জেষ্ঠ্য নাগৰিক মঞ্চ, আকাশী লিটাৰেৰী চ’চাইটিকে আদি কৰি বিভিন্ন দল সংগঠনৰ লগতে বিভিন্ন ব্যক্তিয়ে অভিনন্দন জ্ঞাপন কৰে।

আৰু পঢ়ক : ৰাজ্যত ভয়ংকৰ প্ৰাক নিৰ্বাচনী হিংসা, বিজেপিৰ বুথ সভাপতিক হত্যা